martes, 15 de maio de 2018

XA NON TEÑO MEDO!

Encantounos este vídeo que fixeron noutro cole de Marín, no CEIP Carballal. Cun texto de Mª Victoria Moreno montaron este vídeo tan divertido no que non so participaron os nenos e nenas, senon toda a comunidade educativa. Noraboa un ano máis, encántannos os vosos vídeos das letras galegas!

PRIMAVERA DAS LETRAS CON MARÍA VICTORIA

Cada ano, a Real Academia Galega presenta unha edición de "Primavera das letras" adicada este ano a Mª Victoria Moreno. Nela podemos atopar descargables, actividades en rede e moita información. As ilustracións son auténticas obras de arte, debuxos moi fermosos que transmiten moito sobre a autora e a súa obra. 
Podedes acceder premendo na imaxe.

VIDA E OBRA DE Mª VICTORIA

Fántástico resumo o que fixeron as nenas e nenos do Colexio San Pío X de Ourense sobre a vida e a obra de Mª Victoria. Grazas polo voso traballo! 

RAPEANDO CON MARÍA VICTORIA MORENO


No CEIP Antonio Fernández López presentan a Mª Victoria a ritmo de rap, un traballo chulísimo que podemos ver nestes dous vídeos: noraboa!



COÑECENDO A MARÍA VICTORIA MORENO

Estamos na semana das letras galegas que este ano se adica a unha escritora que non naceu en galicia pero que se enamorou tanto do galego que o adoptou como lingua propia. 

Ilustración de Esteban Acuña, de Tarabelos: títeres e contacontos

Aquí vos deixamos un enlace onde podedes atopar un montón de actividades para saber máis sobre a autora homenaxeada este ano feito no colexio San Luís Romero. 



xoves, 10 de maio de 2018

EXCURSIÓN DE 5º E 6º A CORUÑA

As veces quedan fotos no tinteiro... como estas do viaxe que o 28 de febreiro, o alumnado de 5º e 6º fixemos a Coruña. A viaxe en bus, de hora e media, foi divertida e entretida falando de mil cousas; pero, sobre todo, cando a altura de Santiago de Compostela, comenzamos a ver o chan algo branco. Era neve!!


Xa na Coruña, o primeiro que visitamos foi a Domus ou Casa do Home. Alí, nada máis chegar, vimos unha peli en 3D titulada “Grandes e Pequenos” sobre a vida dun esquío , por unha banda e sobre a dun rato de deserto, por outra, con todos os perigos que os rodeaban a cada un no seu hábitat. Foi moi curiosa, sorprendente e diferente. Gustounos a todos.



Logo deixamos as mochilas e cazadoras recollidas no comedor polo persoal da Domus e comenzamos a visita ás exposicións. 



Había tantas experiencias para facer, ollar, tocar, escoitar, ler, cheirar…que tivemos pouco tempo para tanta cousa. 



Á maioría chamounos a atención o vídeo do parto. Pero todo era moi interesante. 



Durante a comida tiñamos unhas vistas magníficas sobre as praias de Orzán e Riazor. 



Despois de xantar e recoller, aínda tivemos un ratiño máis para continuar a visita: relaxándonos, tirando penaltis e ver a forza con que xutabamos, observando cerebros, a evolución do home…



A visita ao Acuario foi dirixida. A guía foinos levando polas distintas salas. O acuario conta con moita variedade de peixes de distintas clases e dos distintos hábitats mariños. Fomos pasando por eles e recibindo as correspondentes explicacións.




Tamén había unha exposición de arte, feita con residuos que os humanos tiramos ao mar.



O que máis gustou, en xeral, foi, no exterior, o espazo dedicado ás focas. Había frío e estivemos pouco tempo. E no interior, a sala “Nautilus”, onde está o tiburón Gastón e moitísimas clases de peixes.



Despois marchamos para A Casa das Ciencias. Chegamos e subimos arriba de todo. Alí está o Planetario, Sentámonos e sobre a cúpula proxectáronnos un documental sobre a orixe do Universo e o Sistema Solar, Logo fomos baixando polas tres plantas circulares do edificio, cheas de aparellos e carteis explicativos para experimentar, investigar, pensar e xogar sobre cuestións científicas.


Todo nos chamaba a atención, pero unha das cousas que máis gustou foi a incubadora onde había ovos e pitiños. Vimos nacer algún.



Fomos merendar no parque de Santa Margarida e alí xogamos ao escondite e a pillar. Tivemos sorte porque non nos choveu.



Foi un bonito e intenso día. Case 12 horas. Cando chegamos eran case as nove da noite. Aquí vos deixamos unha montaxe con máis fotos desde estupendo e completo día.

mércores, 9 de maio de 2018

LEONARDO E OS FONTANEIROS NO TEATRO

Xunto con nenos e nenas de outros centros de Marín, o alumnado de 5º e 6º desprazouse ao CEIP Carballal para ver unha obra de teatro.


Tratouse dunha representación dun libro imaxinativo, divertido e cheo de sorpresas: "Leonardo e os fontaneiros", unha das obras de Mª Victoria Moreno, a autora homenaxeada este ano nas letras galegas. 


A adaptación foi realizada pola compañía Ubú Teatro e producida pola Editorial Galaxia. 


A representación combina técnicas como a narración oral, a dramatización e o teatro de sombras con siluetas, deixando sempre lugar á improvisación e a interacción co público. 

O texto adaptado baséase en flashbacks mediante os que van construíndo a historia de Antón e Begoña, dous compañeiros de clase que lembran, xa maiores, as aventuras do seu último ano de colexio.



A obra está narrada polo protagonista, Antón, e Begoña, unha compañeira de clase, que lembran, xa de maiores, as aventuras acontecidas no seu último ano de colexio.


Algunhas veces interactúan entre eles e outras o fío condutor é o diálogo de Antón co can, Leonardo, un can da rúa ao que coida como se fose seu.





luns, 7 de maio de 2018

CORRELINGUA 2018

Un ano máis unímonos á festa do galego que este ano se celebrou en Bueu. O lema da 18ª edición do correlingua foi: A LINGUA NON PARA!

O correlingua é unha reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro.
Nenos e nenas dende infantil ata secundaria nos xuntamos para gritar ben forte que "A lingua non para". Xuntos fixemos unha marcha e rematamos bailando e saltando con Paco Nogueiras. (Recordamos AQUI a súa visita ao noso cole e AQUI a entrevista na Voz de Arnaldo)

Unha vez máis Paco nos agasallou con música divertida en galego... sempre consegue animarnos: pasámolo pipa!!! Mirade neste vídeo canto bailamos....


Aquí vos deixamos un montón de fotos como recordo de este día de festa... por suposto a música é de Paco Nogueiras.... grazas Paco por unha banda sonora tan chula! 

En galego: meu o mundo é!!!

mércores, 2 de maio de 2018

APADRIÑAMENTO LECTOR POLO DÍA DO LIBRO

O día do libro tivemos unha maña soleada e marabillosa para desfrutar de lecturas compartidas nos patios do cole. Felices, un ano máis, de compartir cos compañeiros contos e historias que nos fan soñar e viaxar. 


Aquí tendes un video que resume o apadriñamento deste ano. O resultado final é un libro cheo de debuxos incríbles, feitos por todo o alumnado, que podedes ver na biblioteca. 

venres, 30 de marzo de 2018

PONLLE AS PILAS AO TEU BOCATA

Todo o cole desfrutamos de outra actividade especial: "Ponlle as pilas ao teu bocata", unha campaña da Consellería do Mar para o fomento do consumo da conserva de produtos mariños entre os nenos e nenas.
Pinchade na imaxe se queredes saber máis sobre esta campaña.


Está actividade tamén está enmarcada dentro do Plan Proxecta no que participa o cole, dentro da modalidade "Aliméntate ben"


Ademais de aprender moito do beneficiosas que son as conservas, cada un tomou de merenda o bocata que elixiu entre un montón de ingredientes sans e deliciosos. Aquí vos deixamos un resumo en imaxes da actividade que desfrutamos cos PANS: profes da alimentación e nutrición saudable. 


Bocatas de sardiñas, de atún, de vexetais.... paparon todiño!! Opcións moi sans e deliciosas para que lle mandedes na merenda.

CHARLA DIDÁCTICA SOBRE A VESPA VELUTINA

O alumnado de 4º recibiu a visita dun especialista en velutinas. Ensináronlles a distinguilas e a facer trampas xa que están acabando coas nosas abellas. 





O SABOR DA AVENTURA ESTÁ NO MAR

Todo o cole desfrutamos dunha actividade especial: "O sabor da aventura está no mar". Esta campaña ten o dobre obxetivo de facilitar o coñecemento e consumo de produtos do mar de Galicia entre as nenas e nenos, e de incidir e equilibrar as súas dietas alimenticias animándoos a comer diferentes pratos elaborados con peixe e marisco. 
Pinchade na imaxe se queredes saber máis sobre esta campaña na que participa o cole.


Está actividade está enmarcada dentro do Plan Proxecta no que participa o cole, dentro da modalidade "Aliméntate ben"


A actividade basouse nun pequeno teatro didáctico (no que nos repartimos en 3 grupos por idades) e diferentes xogos. Aquí vos deixamos un vídeo resumo do que fixemos co patrón de pesca Luis, a peixeira e Mariña.



Todos firmamos esta carta de compromiso que compartimos coas familias para que nos axuden a cumplir o compromiso. 



No blog da profe María José podedes ver algo máis sobre esta actividade. 

O LUGAR MÁIS BONITO DO MUNDO

Manuel Solla estivo cos nenos e nenas de 3º e 4º para facer unha animación do libro que traballaron na clase: "El lugar más bonito del mundo". Foi fantástico e todos o pasamos en grande: grazas Manuel!









No blog da profe María Jose podedes ver un vídeo moi chulo. Premede na imaxe para poder velo.

ANIMACIÓN Á LECTURA

Os nenos e nenas de 1º, 2º, 3º e infantil, recibimos a visita de Iago, un contacontos que compartiu unhas historias con nós. Aquí vos deixamos algunhas fotos para que vexades canto desfrutamos. 








Se premedes nesta imaxe poderedes ver algunha foto máis no blog da profe María José.



No blog da Lupa Dixital tamén compartiron este vídeo da sesión cos cursos de primaria.